Google ., اعملي الزبادي في البيت زي الجاهزة و مش فيها ماية | تيتة أوزي

اعملي الزبادي في البيت زي الجاهزة و مش فيها ماية


مشكلة الزبادي لما بنعملها في البيت انه بيعمل مايه و اوقات مفرولة ومش بيبقى ناعمة زي بتاع بره لكن تيتة اوزي هاتقول علي سر يخلينا نعمل الزبادي في البيت و يكون طعمها زي الجاهزة بالظبط و من غير اي ماية فيها و ناعمة و مش مفروله خالص و الخطوات كالتالي

اعملي الزبادي في البيت زي الجاهزة و مش فيها ماية
المقادير
 كيلو لبن + علبة زبادي
ولو هاتعملي كميه لبن اقل استخدمي نص معلقة صغيرة زبادي لكل كوب لبن صغير في حجم علبة الزبادي الجاهزة او علبة الزبادي بتاعة جهاز صانع الزبادي

الطريقه
نغلي اللبن و نسيبه يبرد لغاية ما يبقى دافي و لوعندنا لبن مغلي ندفيه علي النار
وبعدين نضيف عليه علبة الزبادي ونضربهم مع بعض في الخلاط او المضرب
والخطوه دي مهمه علشان الزبادي يتمزج مع اللبن كويس و هي دي سر الزبادي علشان تطلع زي الجاهزة
وبعدين نصب اللبن بالزبادي في الكوبايات و لو عندك جهاز صانع الزبادي هانحطهم فيه و نشغله
ولو مش عندك جهاز صانع الزبادي مفيش مشاكل خالص تيتة أوزي برضة بتعرف تتصرف والحل هنجيب صنيه ونملها شوية مايه ونسخن الصينيه على النار لغاية ما المياه تصبح دافية و بعدين نحط الكوبايات بعد ما ملينهم بالزبادي في الصنيه

ونولع الفرن خمس دقايق علشان نخلي الفرن دافي وبعد كدة نطفي الفرن ونحط الصينيه في الفرن ونسيبه في الفرن لمدة اربع  او خمس ساعات علي حسب الجو عندك في المطبخ او الجو صيف او شتاء وعلشان كدة علشان تعرفي الزبادي اتخمرت ولا لا امسكي كوباية و شوفيه ماسكة نفسها ولا لسة سايلة ولو مسكت نفسها نطلعه من الصنية و نغطيها و ندخلها التلاجه ولما تبرد ناكلها وبالف هنا و شفا

وفي انتظار ارائكم و اللي يجرب الطريقة يرجع يطمنا واوعوا تنسوني في دعائكم

هناك 4 تعليقات:

زيارتكم شرفت تيتة أوزي و من فضلكم ساعدوا تيتة أوزي في الانتشار لتعم الفائدة علي الجميع من خلال عمل مشاركة للمواضيع او من خلال ذكر روابط المواضيع في المواقع المختلفة

; Google Profile